«Parimatch 2021 Qazaqstan Hockey Open» турнирі алдындағы баспасөз конференциясының қорытындысы

«Parimatch 2021 Qazaqstan Hockey Open» турнирі алдындағы баспасөз конференциясының қорытындысы

Нұр-Сұлтанда «Parimatch 2021 Qazaqstan Hockey Open» турнирі басталар алдында баспасөз конференциясы болып өтті. Журналистердің сұрақтарына Қазақстан құрамасының бас бапкері Юрий Михайлис пен ҚХФ бас директоры Глеб Каратаев жауап берді.

Ұйымдастырушылар өкілі Глеб Каратаев халықаралық біріншіліктің перспективалары туралы айтып берді.

- Турнир тек Нұр-Сұлтанда ғана емес, сондай-ақ Алматы мен Қарағандыда өтуі мүмкін. Мұны қатысушы-командалармен ақылдасатын боламыз. Өкінішке орай, толыққанды турнир үшін бізде төртінші команда болмай отыр. Пандемия жоспарды бұзды. Оңтүстік Корея командасы мен төрт еуропалық құрама қатысуға ниет білдірген еді. Алайда локдаун және елге оралғандағы шектеулер аяққа тұсау болып отыр. Яғни олар екі апта локдаунда болулары тиіс, ал бұған мүмкіндік жоқ.

Көбірек ойын жинап, мүмкіндігінше көп ойыншыларды көру үшін біз Қазақстан фармын құруды шештік. Оңтайлы құрамды жинап, барлық жігіттердің шамасын байқау. Бұл таптырмас, керемет мүмкіндік. Мұндай мүмкіндік бізде әлем чемпионатының алдындағы жиындарда ғана болады. Оған қоса, Еуропаға оқу-жаттығу жиындарына бару жоспарланып отыр. Турнир көрерменсіз өтеді. Аренада «таза» аймақтар ұйымдастырылды. Аренада болатын бүкіл персонал қайта-қайта термометриядан өтіп, ПТР-тестілер тапсырып отырады. Барлық қызметкерлер, ұйымдастырушылар, сондай-ақ командалар дайын ПТР-тесттермен келеді. Уақытылы кету үшін ұйымдастырушы комитет өтінген бойда тестті осы жерден тапсыруға мүмкіндік береді. Қазақстан чемпионаты мен ҚХЛ жүйесі бойынша «таза» аймақтар дайын.

Мұндай турнир ұдайы өтіп отырады деп үміттенеміз. Біз бұрын мұндай турнирлерге қатысып жүргенімізбен, өзімізде өткізбегенбіз. Кеңінен насихаттау үшін оны Қазақстанның басқа қалаларында да, Алматы немесе Қарағандыда да өткізе аламыз. Осылайша ондағы ареналар халықаралық стандарттарға сай болмақ.

Турнир халықаралық, жолдастық сипатқа ие, сондықтан қос құраманың да бапкерлері қандай да бір мәселелерді шешу үшін ойыншылармен алмасуға құқылы болады, сол себепті де қызық өтпек.

- Командалар оқшаулана ма?

- Иә, Ресей мен Беларусь командалары бір қонақүйде тоқтайды. Ол ҚХЛ-дың көптеген командасын қабылдаған. Оларда жайларды тазалау және командаларды қабаттар бойынша жайғастыру жүйесі жолға қойылған. Сондай-ақ тамақтануға, командалық жиындар өткізуге арналған жайлар ұйымдастырылады. Командалардың кездесу қаупі барынша азайтылды. Қазақстанның басқа қалаларынан келетін Қазақстан құрамасының ойыншылары да бөлек қонақүйде тұрады.

- Жанкүйерлер матчтарды қайдан тамашалай алады?

- Барлық матчтардың көрсетілімдері «QAZSPORT» телеарнасының тікелей эфирінде өтетін болады. Сондай-ақ матчтарды жақсы сапада Ligasy.kz платформасынан көруге болады. Ол жаққа мұндай мүмкіндікті интеграцияладық. Беларусь пен Ресей елдерінің жанкүйерлері де матчтарды елдерінің спорттық телеарналарынан тамашалауға мүмкіндік алады.

- Турнир матчтарына кім төрелік етеді?

- Төрешілер тағы да Қазақстан хоккей федерациясының төрешілер алқасынан болмақ. Бұл біздің ең үздік төрешілер, олар халықаралық федерацияның IIHF лицензиясына ие. Егер биыл көптеген дивизиондар өтетін болғанда, бұл төрешілер халықаралық турнирлерде, іріктеу матчтарында қызмет етер еді.

Қазақстан құрамасының бас бапкері Юрий Михайлис құрамалардың жасақталуы мен ойыншылардың іріктелуі туралы айтып берді.

- «Барыстың» негізгі ойыншылары демалып, жастар ойын алаңына көбірек шығуы мүмкін бе?

- Ойыншыларды «Барыс» пен «Номадтың» бапкерлер штабы іріктеп алды. Біз екі құраманы жасақтап, қатысуға дайын барлық жас ойыншыларды көргіміз келді. Олар ұлттық командаға кіреді деп үміттенеміз. Иә, «Барыстың» көшбасшылары демалып, плей-оффқа дайындалса деген жоспар бар. Қазақстан чемпионатындағы ойыншыларды немесе «Барыста» ойын тәжірибесі аз ойыншыларды қараймыз. Біз барлық жас ойыншыларды қарап шығу үшін екі құрама жасақтадық.

- Құрамалардың ассистенттерін, капитандарын белгіледіңіздер ме?

- Әлі анықталмады, ойыншыларымыз әлі толықтай жеткен жоқ. Әлі келетін ойыншыларды қарап, мұны ертең талқылаймыз. Жігіттер ұшып келген соң сөйлесіп, кандидатураларды талқылаймыз.

- Турнирде жастар көбірек ойнап, «Барыстың» негізгі ойыншылары плей-оффтың алдында демалуға мүмкіндік ала ма?

- «Барыстың» негізгі ойыншылары, команда көшбасшылары демалып, чемпионаттың плей-офф кезеңі мен финалына дербес дайындалатын болады. Қазақстан чемпионатының ойыншыларын қараймыз, сондай-ақ «Барыста» ойын тәжірибесі аз болған ойыншылар құрамаға кіреді.

- Құрама сіздің қоластыңызда қандай ойын стратегиясын ұстанатын болады?

- Бірінші және екінші құрамаға шақырылған жігіттердің көпшілігі «Барыс» жүйесінде ойнаған және команданың қалай әрекет ететінін біледі. Сондықтан сол тактиканы ұстанады.

- Никита Клещенко турнирге қатыса ма?

- Иә.

- Оны Джесси Блэкермен бірге қоймайсыз ба?

- Жоқ.

- Александр Высоцкиймен бірге ойыншыларды екі құрамаға қалай бөлдіңіз?

- Біз Высоцкий екеуіміз «Барыстың» жүйесінде жүрген және талаптарымызды жақсы білетін ойыншыларды жинадық. Үлкендеу жігіттер бізге, жастау жігіттер сол жаққа барды. Алайда біз құрамдарды өзгерте аламыз. Александр Борисевичті көргіміз келеді, соңғы ойындарда тамаша ойнады. Қазақстан Кубогы да оның «Сарыарқа» командасы көшбасшыларының бірі екендігін көрсетті. Сондықтан бұл жігіттің ойынын көру керек.

- Қарсыластардың құрамдарын қарадыңыздар ме? Бұл турнирде команда алдына қандай міндеттер қойып отырсыздар?

- Құрамдарын қарадық, Ресей құрамасына келсек, білуімше онда Нижнекамск пен Сочидің ойыншылары жиналған. Беларусь құрамасында жас ойыншылар болады. Негізгі міндет – әрине әрбір матчта жеңу.